— Par Daniel M. Berté —
Piti, man ka di lè ; gran man pou lé minit
Pli fin ek pli présé, man ka di lé sigonn
Dan an lawonn san fen, man ka matjé li tan
An mont, révèy, lòwlòj, man sé Manzè Zédjui
Mwen piti tij métal, man pé fè an mal fou
Ek si’m fè moun kriyé, sé an mal pou an bien
Si’w asiz anlè-mwen san ou pran pokosion
Si’w pa tjenbé-mwen bien ou responsab mal-ou
Man ni an fant an tèt, ki yo ka kriyé tou
Eti fil ka pasé pou mwen endé’y koud twèl
Monté bouton, présion, rapiésté divès lenj
Endispansab man yé, man sé zédjui a koud
Men man pé koud osi adan tout kò an moun
Lapo’y pa andérò, toupatou andidan’y
Kolé dé bout lachè épi konpè-mwen fil
Man fò kon an doktè, mwen zédjui chiriji
Adan bout an séreng, man ka endé an moun
Si sé pou tiré ba’y, man sé zédjui ponksion
Si sé pou pòté ba’y, man zédjui enjeksion
An manniè kon an lòt, man pé sové’y lavi
Jòdijou man vini ankò pli potalan
Adan limond antié sé mwen yo ka sèvi
Man sé zouti de baz an lanmen lé swagnan
Pou yo pé sa konbat lapandémi kovid
Fodré imajinen ki si man pa té la
Konmen moun anmèwdé, kouman zafè mélé
San mwen moun fini bat, yo pa sav ki lè’y yié
Respèkté-mwen souplé, man sé Misié Zédjui
Daniel M. Berté 40120