— Par Daniel M. Berté —
Grenn tonbé
Man lévé
Pyé an tè rasiné
Branch anlè ansiélé
Jòdiya man ka di
Sa ka fè-mwen pléré
Chak kout fret an do neg
YO maré anlè-mwen
Té ka fè zépin-mwen
Antré adan kò-yo
Magré mwen magré mwen
Sa ka fè-mwen pléré
An branch-mwen
YO pann neg
Ki té za mawonné
Pou trapé Libèté
Ek chien-YO kaptiré
Sa ka fè-mwen pléré
Lé kapon ka fè won
Pou sa évité-mwen
An tet-yo yo ka di
Fo pa pasé anba’y
Sa ka pòté malè
Sa ka fè-mwen pléré
Ek lé Vandrédi trez
Soukougan jan-gajé
Zonbi épi chòché
Ka vini ba’y pentenng
Tout-oliwon tron-mwen
Sa ka fè-mwen pléré
Ni boul moun ki pè-mwen
Ka di ki man modi
Man sé mové pyébwa
Ka ba’y malédision
Man ka jwé épi djab
Sa ka fè-mwen pléré
Ofon sa pa si mal
An tel répitasion
Len-dan-lot sa permet
Ki yo respekté-mwen
Ek kité-mwen trantjil… Men
Sa ka fè-mwen pléré
Jodijou Ansdawlé
Ni an frè yo siyé
Dèmen man asiré
An lo ka’y rigrété
Man tris man angawsé
Sa ka fè-mwen pléré
Daniel M. Berté 60623