— Par Daniel M. Berté —
Wè ! Di wo gadé-mwen
konsi man pa ayen
wou ki bon sitwayen
Akondi ou pa sav… ki lavi lari red
Wè ! Trousé nen’w lè’w wè-mwen
pas man ni lodè chen
wou ki za bien benyen
Akondi ou pa sav… ki lavi lari red
Wè ! Ou pé twazé-mwen
pis man sé bonnarien
wou ki sé jan de bien
Akondi ou pa sav… ki lavi lari red
Wè ! Tounen tet lè’w wè-mwen
pou’w man ka détonnen
wou ka suiv bon chimen
Akondi ou pa sav… ki lavi lari red
Wè ! Vréyé mépri ban-mwen
paske man pa ni pen
wou ki ni bouden plen
Akondi ou pa sav… ki lavi lari red
Wè ! Chèché konsey ba-mwen
pas man mwens-ki-ayen
wou ki sé bon krétjen
Akondi ou pa sav… ki lavi lari red
Wè ! Ou pé jis jouré-mwen
pas man lonjé lanmen
wou moun lanmen fèmen
Akondi ou pa sav… ki lavi lari red
Wè ! Ou pa kouto frè-mwen
man pa jomou’w kouzen
wou pa sav fon tjè-mwen
Mé man sèten ou sav… ki lavi lari red
Daniel M. Berté 80218