— Par Daniel M. Berté —
Lariya ka élé
Pou pé sa di bonjou
Bonjou mennen ki-nov
Ki-nov mennen milan
Lariya ka kozé
Bouch-anba-bra palé
Chui-chui-chui mirmiré
Pou pé makòkòté
Lariya ka maché
Manniè vitman présé
A la bonda rimen
Janr mi-ta’w-mi-ta-mwen
Lariya ka kriyé
An manniè anrajé
Paré a balancé
Dé kout-kouto filé
Lariya ka pran-pié
Zwel tiyanmay ka jwé
Foutbol friyapen blé
Kous serso ka woulé
Lariya ka karnavalé
Kat jou diran san rété
Tout manmay dégizé
Ka dansé ek vréyé monté
Lariya ka jouré
Konba djol démaré
Kò lé manman mélé
Ladjè pres déklaré
Lariya ka manifesté
Djoubakè an volonté
A pié ka rèvandikè
Pou trapé an ti-zagré
Lariya ka dousèré
Bel parol ka tonbé
An zorey an pépé
Pou sa fè an koulé
Lariya ka pléré
An kortej ki fòrmé
Pou pé akonpagné
Sa Met Bazil chayé
Laria ka chanté
Pou fè piblisité
Titiri fré ! titiri fré !
Volé blé ! volé blé !
Lariya ka palé
Pawol sikré-salé
Yo di-mwen, man tann-di
Pa di sé mwen ki di
Daniel M. Berté 110623