— Par Daniel M. Berté —
An labribis pété dézod
Epi an bis ki fè rita
Si lapawol de lom vo lom
Sé lorew di bis ki fè le bis
Dayè lè’w pa rivé a lè
Vwayajè ka di pa ni bis
Si pa ni bis ou initil
Kivédi ki ou pa pèsonn
Simenn pasé sété lagrev
Epi konpè’w la lign Zéwo
Ek tousa san avertisman
Ki fè boul moun lévé faché
A koz di wou man ka sibi
Mové kolè ek wouspétans
Dé zizajé ki an soufrans
Pou kadans ou pa respekté
Man ka tan moun ka babiyé
Pas ou ka mélé lavi-yo
Fè-yo raté an randévou
Rivé anrita o travay
Fè-yo ped tan pou zafè-yo
Epi fè tansyon-yo monté
Jis ni adan ki ka jouré
Pou pé trapé an soulajman
Dot oblijé ka pran’y a pyé
Tousa pas ni dé isalop
Ki pa rivé owganizé
Sa yo kriyé sèvis piblik
Bis-la pa réponn labri-ya
I démaré san menm pansé
Ki zavè tjou mel ki pran plon
Ek ki rété pou la pléré
Daniel M. Berté 150724