— Par Daniel M. Berté —
Souvantman, a labrin-di-swè
Kan lapot-zié siel ka fèmen
Man ka désann an lespri-mwen
Pou vwayajé dan an fè-nwè
Man ka rantré an réfleksion
Anlè sa’m fè an lajounen
Gadé kisa man fè di bien
Ek osi lé movèz aksion
Sé lè man ka alé o fon
An zantray-boyo lakonsians
Ek sé lè ba kò-mwen an chans
Di rimété’y o fil-a-plon
Pa alé kwè sé jé fasil
Di mété kò’w an fas-a-fas
Siwtou lè’w fè an mové kras
Ka fè’w pran létjèt an katjil
Si’w fè an moun an méchansté
Menm si sa pa té volontè
Fo sav ki moun tala soufè
Sa nòwmal ki ou réparé
Sé la pou’w montré ki’w kapab
Réparé linjistis ou fè
Padon a mandé frè ek sè
Ek rikonnèt ki’w té koupab
Yo ka di gran-nonm pa ka wont
Rikonnèt tò’w sa ka grandi’w
Pa bliyé sa an saj té di’w
Mové balans pa ka fè kont
Sé alòw k’a labrin-di-swè
Man ka gadé zié-mwen fèmen
Ek ka pran rézolision-mwen
Pou dimen konduit-mwen pli klè
Daniel M. Berté 210420