— Par Daniel M. Berté —
E poutan
Avan i té bien pòtan
I té ka chanté toulitan
Kouri an savann o chan
Dèyè tout poul a bel kanman
E poutan
Epi yo i té boug galan
Bel ganm épi pawol charman
Ka plen tet-yo tout-an riyan
Ka fè kous dèyè lé manman
E poutan
I té an kok vayan-vayan
Pa kokoriyè anlè ban
Men an tet lé pyé flanbwayan
Pou sa lévé lé zabitan
E poutan
I té majò a gran balan
Adan pitt i té atatjan
Prèmié a balansé kakan
A dérayé tout konbatan
E poutan
I pa té an tirè-o-flan
Lè’y té adan konba méchan
Sé té dé kout bek dékalan
Epi dé kout zépon sanglan
E poutan
Toujou paré a pran douvan
Adan tout konba san manman
I pa té vini kanyan
Kon vié kok ki an désandan
E poutan
Pa ni fésé dot anlè kan
Ni kwenyen lestonmak a blan
Sé li jòdi ki anlè flan
Tet koupé, ka benyen an san
Et poutan
An frikasé épi diri blan
Pou banbochè ka fété ventan
Labonm épi bon lamizman
Kok-la mò bonmaten-an
Daniel M. Berté 11124